Zimbabwe sipaiten President leh a nupui hreng

Zimbabwe sipaite chuan President Robert Mugabe leh a nupui, Grace Mubage chu hrengin, an ram khawpui Harare-a sorkar official te chu an kutah a awm tawh tih an sawi.

Sipaite hian Thawhlehni zan khan state broadcaster, Zimbabwe Broadcasting Corporation chu lain, nimin khan President-te nupa hi an hreng tih an sawi a ni. Hetih lai hian tun thla tira Mugabe-an a vice president aṭang a ban, Emmerson Mnangagwa chu ramdanga a tlanchhiat hnuah nimin khan Zimbabwe ramah hian a kir leh bawk. Emmerson Mnangagwa hi sipaite nen hian inzawmna ṭha tak an nei nia sawi a ni.

Kum 93 mi Mubage leh nupuite hrenna hmun hi hriat a ni lo a, mahse sipaite chuan an him thu an sawi. President hren a nih hnu hian sipaite chuan Harare-a parliament bula kawngpuite chu an dang nghal a ni.

Sipaite chu sorkar thuneihna paihthlak tuma puh an ni a, mahse hei hi sipai lam chuan phain, pawikhawihtute laka beihpui an thlakna niin an sawi thung. Mahse sipai hotute chuan President hian rorellai party, Zanu-PF hruaituah kum upa lam zawkte a dahluh belh zel chuan a kaihhruai sorkar chu sipai chakna hmanga paihthlak mai hlauhawmah a awm ang tiin an lo vau tawh a ni.

Zimbabwe-a US embassy chuan politics buaina thleng mek avangin an mi leh sate chu pawn chhuak lo tur leh, hmun pakhata awmkhawm turin a chah.