Iran President-in lirnghinna bial tlawh

Iran President Hassan Rouhani chuan lirnghing vanga chhiatna nasa tak thlenna, an ram khawthlang lama Kermanshah province a tlawh a, chhiatna thlen dante leh chhanchhuah hna thawh dante a enpui.

President Rouhani chuan lirnghing tuartute chu thlamuanin, sorkar chuan a rang thei ang berin an harsatna tawh mek chinfel dan a ngaihtuahpui dawn tih a sawi.

Pathianni zana Iran leh Iraq inrina bula magnitude 7.3-a na lirnghing vanga thi hi mi 445 an tling tawh a, mi 7,000 chuangin hliam an tuar bawk. Ṭum 230 chuang aftershock a thleng tawh bawk a, hengte hi magnitude 4.5–6.1-a nate an ni.

Lirnghingin thil a tihchhiate hi dollar maktatduai 450 hu vel niin chhut a ni a, hetihlai hian in leh sumdawnna hmun chhiate report a la luh belh zel bawk. Kermanshah province governor office-a Construction Deputy Mojtaba Nik-Kerdar chuan rural area-ah chenna in 11,000 leh urban area-ah 5,000 a chhia niin a sawi. President Rouhani chuan lirnghingin in a tihchhiatte siamṭhat hna thawhna tur hian sum tam tham tak pek a nih tur thu a sawi bawk.