Isua Krista ni loin President Xi-an a chhanhim thei che u: China

China chhimchhak lama Kristiante chu sorkar aṭanga hamṭhatna dawng thei turin Isua Krista lem an tarte la thla a, President Xi Jingping lem tar zawk tura hrilh an ni.

Jiangxi province-a Yugan county-a chengte chu an retheihna leh natna lak aṭangin Isua Krista-in a chhanhim thei lo a, mahse Chinese Communist Party zawkin a chhanhim thei tiin official-te'n an hrilh a, hei vang hian Isua lem aiah President Xi-a thlalakte tar zawk turin an ti a ni.

Jiangxi province hi Kristian tamna niin, he biala cheng mi maktaduai khat (10% ) chu Kristian an ni. He province-a cheng zinga 11% aia tam chu mi rethei, poverty line hnuaia awm an ni bawk.

Washington Post-in a tarlan danin, official-te'n an hrilh hnuah Yugan county-a chengte chuan Kristian sakhua lamhawi thlalak poster an tar 624 chu la thlain, President Xi-a thlalak 453 in an thlak niin a sawi.

President Xi-a rorelna hnuaiah rorellai Communist Party of China chuan kum 2020-a an rama retheihna umbo hman tumin hma a la mek a ni. Party member-te chuan thingtlang khaw hrang hrangte fangin, mipuite hnenah an party-in retheihna umbo tura hma a lak dante, agriculture lam tihhmasawn an tum dante an hrilh a ni.

Huangjinbu people congress chairman, Qi Yan chuan, "Chhungkaw tam tak chu damlohna leh hrisel lohna avanga rethei takin an awm a, heng mite hian an natna tidam turin Isua chu an ring a ni. Mahse an hnenah hian natna an tawhna chhan chu taksa lam thil a ni a, anmahni pui theitu tur dik tak chu Communist Party leh General Secretary Xi anih thu te kan hrilh a ni", a ti. Thingtlang mi tam tak chu mawlmang tak tak, Pathianin an retheihna lak ata chhandam tura ring tlat an ni, a ti. Mahse an party mi leh saten thil awmdante an hrilhfiah hnuah, an dik lohna te hriain, anmahni ṭanpuitu tan Isua ring lo a, party rin a ṭul zawkzia an hrechhuak ta a ni, tiin a sawi. Qi chuan President Xi-a thlalak hi 1,000 chuang an sem a, hengte hi inah an tar vek tawh niin a sawi bawk.