UN hotuin mipui sorkar din turin Myanmar a nawr

United Nations secretary-general Antonio Guterres chuan Myanmar sipai sorkar chu sipai rorelna titawp a, mipui aiawhte rorelna sorkar din thuai turin a nawr.

Nikum February thlaa Myanmar sipaiten democracy sorkar thuneihna hnehchhuh a, thuneihna an chan aṭangin ramchhungah buaina a la thleng chhunzawm reng a ni. Guterres chuan Myanmar ram dinhmun chuan a chhehvel ram himna thlengin a tiderthawng a ni, a ti.

Inrinnia chanchinthar lakhawmtute a kawmnaah, UN hotu chuan,"Myanmar rama thil thleng mek hi an ram mipuite tan chuan mumang rapthlak, tawp mai thei lo a ni, an chhevel ramte himna thlengin a tiderthawng a ni," a ti. Hei vang hian Myanmar sipai thuneitute chu mipuite aw ngaihthla a, politics thil avanga an mi mante chhuah a, democracy sorkar din leh thuai turin a nawr a, hei hi an ramin boruak ṭha leh muanna an neih theihna kawng awmchhun a nih thu a sawi bawk.

Guterres hian ASEAN hruaitute pawh kawmin, an member ram Myanmar-a sipai sorkar nena remna leh muanna a awm theihna tura ruahmanna an siam chu a pawimawh hle tih a sawi a ni. ASEAN hian nikum April thla khan Myanmar rama tualchhung buaina leh thisen chhuahna thleng titawp a, boruak muanawm a awm theihna atan Myanmar sipai sorkar chu inremna a lo siampui tawh a ni. Mahse he inremna siam hi Myanmar sipai hotuten an kengkawh duh lo a, awmzia a nei thei lo. Kar liam ta khan ASEAN hruaitute chuan an ram foreign minister-te chu inremna lo siam tawh hi chak zawka kalpui a nih theihna tura ruahmanna siam loh an ngen leh.