WHO chief scientist Swaminathan a bang dawn

World Health Orga­nisation (WHO) chief scientist Dr Soumya Swaminathan-i chuan kum nga chhung hna a thawh hnuah November 30 hian a hna aṭanga a ban tur thu leh, India ramah let a tum thu a sawi. Kum 63 mi hian WHO mandatory retirement age hi kum hnihin la phak lo mah se, practical work tam zawk nei a, India rama chenga hnathawh a chak ṭhin thu a sawi.

Tuberculosis leh HIV chungchangah research ṭha tak a neih avanga khawvel hriat hlawh Swaminathan hian WHO-ah kum 2017-a deputy director general hna a chelh hma khan, Indian Council of Medical Research-ah kum hnih chhung chu director general hna a lo chelh tawh bawk. Agency-in science division-a din hnuah, kum 2019 aṭang khan WHO-a chief scientist hmasa ber ni tura thlan a ni.

Khawvel pumah corona­virus a len lai khan, WHO science division hian hna an thawk ṭha hle a, chung zingah Covid-19 kai damlote enkawlna tur kawnghmang ṭha tak an duang chhuak.

"Khawvel ram pum huapah kum nga chhung hun ka hman hnu­ah, research leh policy chung changah a taka hnathawh leh ka chak avanga ban tum ka ni. WHO-a ka awm chhunga ka suangtuahna leh ngaihtuahnate chu puitlin ka rilruk a ni," tiin India ramah leta hriselna lama hmasawnna ngaih pawi­mawh a tum tih Swamina­than chuan a sawi.

India rama a let hunah scientist hmingthang, father of India Green Revo­lution-a tiha sawi, a pa Dr M S Swaminathan hriatreng nan leh a suangtuahnate tipuitling turin agriculture, nutrition leh hriselna ṭha zawk an neih theihnan a thiamnate hman a tum thu a sawi a ni.