Russia-in Kherson-ah war crime vawi 400 chuang a thlen : Zelenskyy

Ukraine president Volodymyr Zelenskyy chuan kar hmasaa Ukraine sipaiten Russia kut aṭanga an laklet, Kherson khuaah Russia sipaite chu civil mite that leh war crime vawi tam tak thlenah a puh.

President Zelenskyy chuan, "Russia war crime thlen hi vawi 400 chuang kan chhinchhiah. Civil mite leh sipai ruang ṭhahnem tak chhar a ni," tiin Pathianni zan khan a sawi. "Russia sipaite chu region danga nunrawng taka an chetna ang bawk khan an che nawn leh," a ti. Hetih lai hian Russia chuan an sipaite chuan tum reng vanga civil mi thah an neih loh thu a sawi thung.

February 24-a Russia-in Ukraine a run aṭang khan, Ukraine hmun ṭhahnem takah civil mi phumna hmunpui hmuhchhuah a awm nual tawh. Kharkiv region leh Kyiv bula awm, Bucha-ah innghaisakna nasa tak a thleng tih finfiahna a awm thu sawiin, Ukraine chuan Russia sipaite chu pawikhawihna thlentuah hian a puh.

United Nations commission chuan October khan Ukraine-ah war crime a thlen ngei thu leh, chung zinga a tam zawk chu Russia sipaite tih a nih thu a sawi. A bikin indo ṭan tirh kar khan mihringte dikna chu nasa taka palzut a ni, a ti.

Russia-in indo ṭan tirh aṭanga region khawpui an lak awmchhun, Kherson an chhuahsan hnuah Zirtawpni liam ta aṭang khan Ukraine sipaite chuan he khawpui hi an thleng ve thung a ni. 

Nimin khan President Z e l e n s k y y p a w h i n Kherson hi a tlawh. United States chuan nimin khan, Russia tana military technology supply ṭhintu mimal leh companyte lakah hrekna a tichhuak dawn tih U.S. Treasury secretary Janet Yellen chuan a sawi.