EU-in Iran official ṭhenkhat hrekna siam

European Union (EU) chuan Iran sorkar laka lungawi lohna lantirtute chunga an chet dan rawng tak avangin Iran official leh sorkar pawl ṭhenkhat hrekna a siam.

Brussel-a EU foreign minister meeting chuan, Iran off icial-te hrekna tur hi an siam a ni. Hemi hma lawk hian Iran sorkar chuan lungawi lohna lantirtu man zinga pakhat, thi tura hremna pek a nih thu a tichhuak a ni.

EU foreign policy hotu Josep Borrell chuan, nawrh huaihawtte rahbeh an nih chungchanga mawhphurtute hrekna hi kan siam a ni tiin, Iran chuan EU hrekna siam chu an chhan let ngei tur thu a sawi ve nghal bawk.

EU minister-te hian Russiain Ukraine-a energy structure beihna atana Iran kamikaze drone a hman chungchang pawh sawiho an tum. EU hian Iran drone siamtu leh, Russia-a supply a nih chungchangah sipai official pathumte hrekna hi a lo siam tawh a, an rama an thil neihte khawih chet theih lohin a dahsak bakah, visa pek khapna a siam tawh bawk a ni.

Official chuan Iran-in Russia hnenah ballistic missile a thawn nia report awm pawh an chhui chiang mek tih sawiin, hei hi a dik a nih chuan hrekna na zawk an siam leh tur thu a sawi.