Cambodia court-in eptu party lian ber a ṭhiat

Cambodia Supreme Court chuan an rama eptu party lian ber, Cambodia National Rescue Party (CNRP) chu sorkar paihthlak tuma puhin a ṭhiat. CNRP chuan an puhna hi thu dik lo niin a sawi thung.

Court-in CNRP a ṭhiah hnu hian party member 100 chuang chu kum nga chhung politics khelh khapsak an ni zui bawk.

Eptu party lian ber ṭhiah a nih tak avangin nakuma inthlanpui an neih turah rorellai party, Cambodian People's Party khing thei lian tham an awm dawn ta lo a ni. Prime Minister Hun Sen hian kum 32 chhung zet ro a rel tawh a ni.

Kum 2013 inthlanpuiah khan CNRP hi rin phak bakin a rawn che ṭha a, nakkuma inthlan neih turah pawh beiseina sang tak an nei a ni. Mahse court-in a ṭhiah tak avangin seat 123 awmna, National Assembly-a seat 55 an neih mek pawh an hloh dawn a ni. CNRP hruaitu hlun, Mu Sochua leh party MP eng emaw zat chu ramdangah an tlanchhe nghal a, Sochua chuan court thutlukna siam chuan Cambodia rama democracy tlukchhiatna a lantir a ni, a ti. Ramdangte chuan Cambodia democracy tluchhe tur chu thlir mai mai lo se a duh thu a sawi bawk.

Supreme Court president, Judge Dith Munty hi rorellai party-a senior member a ni. Court thutlukna a puanah, Judge Munty chuan CNRP-in thubuai ngaihtuahnaa lawyer a tir duh loh vangin hei hian an tihsual an pawm tih tilang a ni, a ti. Mahse CNRP chuan a hma aṭangin thutlukna siam dan tur hi an an lo rel fel vek tawh niin a puh thung.