IS-in an ram lak 95% an hloh tawh : US

Islamic State (IS) firfiakten kum thum kaltaa Iraq leh Syria-a an ram laka zinga 95% chu an hloh leh tawh niin US kaihhruai ṭangrual te chuan a sawi.

Ṭangrual pawla US palai, Brett McGurk chuan Jordan-a meeting an neihnaah kum 2014 khan IS beilet tur hian ṭangrual pawl hi din a ni a, US kaihhruaia beihpui an thlaknaah Iraq leh Syria-a IS-te ram lak 95% chu laklet sak an ni tawh a ni, a ti.

Kum 2014 khan IS hian Syria leh Iraq sipaite kut aṭangin ram zau tak an la a, Islam lal ram an din thu an puang zui a ni. Heng ram pahnih aṭanga IS ho ram lak hi Britain ram tiat dawn a tling a, ramdang aṭangin an pawl zawmtu mi eng emaw zat an lut bawk.

Mahse US kaihhruaiin firfiakte lakah hian beihpui thlak chhunzawm reng a ni a, an ram awp ṭhin tam zawk pawh laklet sak an ni tawh a ni. McGurk chuan IS ho sum dinhmun pawh hi a ṭha tawh lo hle niin a tarlang bawk.

Ram dang aṭanga IS zawm tuma Syria rama lut pawh an awm mumal tawh lo niin McGurk chuan a sawi. IS firfiakten pawikhawihna an thlen tur venna atan border security, aviation security, law enforcement, financial sanction leh intelligence lamahte thawhhona ṭha zawk an siam zel thu a sawi.