Mugabe duhlotuten kawngzawh huaihawt

Zimbabwe sipaiten an hren mek, President Robert Mugabe duh lotute chuan Inrinni khan an ram khawpui, Harare-ah kawng an zawh a, Mugabe chu bang turin an phut.

Kar kalta Nilaini khan Zimbabwe sipai, Zimbabwe Defence Forces (SDF) chuan an ramah thuneihna inpein, sorkar building leh hmun pawimawhte an thunun a, President Mugabe leh a nupui Grace Mugabe-te pawh an hreng zui a ni. Mahse sipaite chuan an thiltih hi sorkar paihthlakna ni loin, dik lo taka thiltite laka beihpui an thlakna leh an ram politics buaina chinfelna niin an sawi thung.

Kar kalta Nilaini aṭanga pawnchhuak thei loa hren a nih hnuah, Zirtawpni khan Mugabe hi mipuite hmaah a inlan leh a ni. Mugabe hian a thachhang dawltu ber leh amah thlaktu tura rinkai ber, a vice president Emmerson Mnangagwa chu kar hmasa khan a ban a, hei hi a aiawh tura an nupui tana kawng a hawnsakna nia ngaih a ni. A deputy a ban hnuah sipaite hi an rawn inrawlh ta a ni.

President Mugabe hian sipai hotute hmuh a, inbiakna neihpui a tum. An inbiakna hi Catholic puithiam kaihhruaina hnuaiah neih a ni dawn niin state TV chuan a tarlang. Hetihlai hian rorlellai, Zanu-PF party pawhin an hruaitu hi ban a nih tur leh tur loh chungchang ngaihtuahin meeting an nei dawn bawk.

Inrinni-a Harare-a kawng zawhnaah hian tel an ṭhahnem hle a, Mugabe-a thlalakte pawtthlerin a office leh chenna in bulah kawng an zawh a ni. Kawngzawhte chuan Mugabe chu bang tura an phut thu an aupui bawk.