I-Day lawmna a tel turin Lebanon PM a haw dawn

Saudia Arabia aṭanga Lebanon Prime Minister a nihna aṭanga a ban thu puangtu, Saad Hariri chuan November 22-a Independence Day lawmna neih tura tel turin Lebanon-ah a kir dawn tih a sawi. An rama a kir hunah hian mipuite hnenah a dinhmun dik tak pawh a hriattir tur thu a sawi.

Saad Hariri hian November 4 khan Saudi Arabia aṭangin a ban thu hi a puang a, hei hi Saudi Arabia in a nawrluih vang niin Lebanon thuneitute leh Iran chuan an puh. Hariri hi Saudi-ah hian hrenbeh a ni bawk niin an sawi a ni. Mahse Saudi Arabia chuan an puhna hi thu dik lo a nih thu leh, Hariri hi a duhna hmun apianga kal tura a zalen thu a sawi thung.

Hariri chuan banna a thehluhna chhanah Iran sorkar leh Iran-in a thlawp, Lebanese Hezbollah pawl a puh thung. Amah thah tuma phiarruk a nih thu pawh a dawng niin a sawi. Hariri-a pa, Prime Minister hlui Rafik al-Hariri pawh kum 2005 khan Beirut-ah truck bomb hmanga thah a ni a, tun thlengin he thubuai hi chhui a la ni.

Inrinni zing khan Hariri hi a nupui, Lara nen Saudi Arabia khawpui, Riyadh aṭangin Paris-ah an kal a, France President Emmanuel Macron nen Elysee Palace-ah chaw chhun eiin meeting an nei nghal a ni. Meeting zawh hnua chanchinthar lakhawmtute a kawmnaah, Hariri chuan Beirut-a a kal tur thu leh, independence day lawmnaah a tel tur thute a sawi a, Lebanon President Michel Aoun a hmuh hnuah an ram mipuite hnenah a dinhmun dik tak chu a hrilh dawn tih a sawi.