China-in buaina chinfel pui a tiam

China chuan Rohingya raltlan tam tak an luh avanga Bangladesh-in harsatna a tawh mek chinfelna tura puih a inhuam thu a sawi.

August thla-a Myanmar sipaiten Rakhine state-a Rohingya-te laka beihpui an thlak hnuah khan Bangladesh ramah hian Rohingya Muslim raltlan nuai ruk chuang an lut tawh a ni. Hemi hma hian Bangladesh-ah hian Rohingya mite hi nuai 2.5 vel zet an lo awmsa bawk.

Bangladesh chuan raltlan lut tharte hi Myanmar rama thawn kir leh a duh a, hemi tur atan hian Myanmar sorkar pawh a lo be tawh a ni. Hemi kawnga pui tur hian Myanmar ram ṭhianṭha, China puihna pawh a mamawh niin a sawi.

Kar kalta Inrinni khan Dhaka-ah Bangladesh Foreign Minister AH Mahmood Ali leh China Foreign Minister Wang Yi-te chuan Rohingya te chungchang hi an sawidun a ni.

Bangladesh foreign ministry thuchhuah chuan, Myanmar mi an ram a tlanchhiate chungchang sawichhuah a nih chuan China Foreign Minister in an buaina chinfel pui tura puih a inhuam thu leh, thlei bik nei loa thil a kalpui tur thu a sawi a ni, a ti. Wang chuan hemi chungchangah hian Bangladesh leh Myanmar chuan inbiakna an neih chhunzawm zel a ṭul thu a sawi bawk.