Israel President-in Sorkar thar siam turin Netanyahu sawm

Israel president Isaac Herzog chuan prime minister hlui Benjamin Netanyahu chu sorkar thar siam turin a sawm a, ni 28 chhung ṭangrual sorkar siam tur hian hun pek a ni ang.

November 1-a Israel inthlanpui neihah khan Netanyahu kaihhruai, Likud party leh a thawhpuite chuan Parliament seat 120 awmah seat 64 lain majority an nei pha a ni. He inthlan hi kum li chhunga Israel-in inthlanpui a neih ṭum ngana a ni.

President Herzog chuan Jerusa­lem-a a chenna ina meeting an neihah, Netanyahu chu sorkar thar siam turin a ti a, kum 73 mi Netanyahu chuan a sawmna hi pawmin, Israel mi zawng zawng tan an thawk dawn tih a sawi zui nghal a ni.

Sorkar thar siam tur hian ni 28 hun pek a ni a, mahse Netanyahu hian hemi chhunga a thawhpui turte nen inremna an siam fel mai loh chuan, President hnenah kar hnih chhung hun pawtsei turin a dil belh thei ang. Mahse an thawhpui turte nen hian inremna hi an siamfel mai rin a ni. Likud party bakah right-wing bloc - Shas, United Torah Judaism, Religious Zionism, Jewish Power leh Noam-te chuan Netanyahu hi an thlawp.

Likud party hi party mala seat la hnem ber niin, PM kalchhuak tur Yair Lapid-a kaihhruai Yest Atid chuan seat 24 a la. Likud party thawhpui lian ber, Religious Zionism hian seat 14 lain, Shas leh United Torah Judaism hian seat 11 leh pasarih an la bawk.

Israel ram Prime Minister dinhmun chelh rei ber lo ni tawh, Netanyahu hi inthlanpuiah ṭum nga a chak tawh a, tun ṭum hi PM a nih ṭum rukna tur a ni.