Myanmar inthlanpui neih tura ruahman KNU political wing-in an pawm lo

Myanmar rama chibing helpawl lian ber, Karen National Union (KNU) political wing chuan sipai sorkarin nakkuma an ram inthlanpui neih tura an ruahman chu an pawm lo tih an sawi.

KNU kaihhruai National Unity of Karen Ethnic Armed Groups-in Takaw khuaa public meeting an neihah, sipai sorkar ruahmanna an pawm loh thu hi an sawi a ni. He meeting-ah hian Karen armed group hrang hrang, sakhaw pawl leh Karen political party hruaitute an tel a ni.

Meeting zawh hnua thuchhuah an siamah, KNU chuan, "2008 Constitution chu a tirte aṭangin KNU chuan a pawm lo a, sipaiten civil sorkar thuneihna an hnehchhuh hnuah chhiatna nasa tak an thlen dante mit ngeiin a hmu a ni," a ti. 2008 Constitution chu sipai sorkar hmasain, politics lama sipaite dinhmun sawhnghehna tura a siam a ni tih an sawi bawk.

Sipaiten kum 2023 inthlanpui neih tura an ruahman pawh 2008 Constitution tihnun thar leh an tumna a ni tiin, democracy kalphung dik taka inthlan neih chu an pawm rualin, dictatorship tihchakna tura hmalakna erawh chu an thlawp thei lo tih an sawi.

Kum 2023 inthlanpui neih tura ruahman hi kum 2021 inthlanpuia hnehna changtu, Aug San Suu Kyi-i kaihhruai, National League for Democracy (NLD) pawhin an pawm lo tih an lo sawi tawh bawk a, Myanmar mipui tam zawkin an thlawp lo bawk.