Indonesia-a lungalhthei hman titlem turin ram hausaten pui dawn

Ram hausa intelkhawm chuan kum 2050-ah Indonesia ram chu lungalhthei a hman tihtlem a, carbon neutrality a awm theihna atan USD tld 20 hmanga puih an remti.

United States, Japan, Canada leh Europe ram parukte chuan Bali-a G20 summit neih kar lakah Indonesia ram puihna tur inremna hi an ziak a ni. Lungalhthei lama Indonesia economy innghahna chu thlakin, power sector lamah an inthlak theihnan an pui dawn tih White House thuchhuah chuan a tarlang.

He inremna hnuaiah hian, khawvela rain-forest lian pathumna awmna, Indonesia chuan kum 2050 hmain carbon-neutrality thlen hman an tum thu sawiin, a hmaa an lo intiam aiin kum 10-in a hma zawk dawn a ni. Kum 2030 hmain renewable energy a leta siamchhuah a intiam bawk.

Indonesia president Joko Widodo chuan an inremna chu ṭha a tih thu leh, khawvel ramdangte pawh 'climate goals' hlen a nih theihnan ṭan la turin a chah.

He inremna sponsor-tute sawidanin, Indonesia chuan clean energy siamna tur hian public sector finance-in USD tld 10 leh private sector funding kaltlangin USD tld 20 chu kum 3-5 chhungin a dawng dawn a, heng sumte hi grants,concessional loans, market-rate loans, guarantees leh private investment hmang tein pek a ni ang.