Mugabe-an President aṭanga ban a tum lo

Zimbabwe President Robert Mugabe chuan president a nihna aṭanga bang tura nawrtu hrang hrang awm mah se, ban a tum lo tih a sawi.

Robert Mugabe hi rorellai party, Zanu-PF party chuan Pathianni khan party hruaitu a nihna aṭangin a ban a, president a nihna aṭanga bang tur hian darkar 24 hun a pe a, a bang duh loh anih chuan paihthlakah an vau a ni. Mahse TV-a thu a sawinaah, Mugabe chuan party hruaitu nihna chu a la chelh chhunzawm zel tur thu leh, December thlaa party inthlanna neih tur pawh a la kaihhruai tur thu a sawi.

Mugabe hian kar hnih liamtaa khan a deputy, Emmerson Mnangagwa chu a ban a, hei hi a aiawh tura a nupui a ruat theihna tura a ruahman nia ngaih a ni a, sipai hotute a ti lungawi lo hle. Hei vang hian kar hmasa Nilaini khan Zimbabwe sipaite chuan an ram khawpui, Harare-a sorkar building pawimawhte chu lain an thunun zui a, President-te nupa pawh hi an hreng zui bawk a ni. Mahse sipaite chuan President thuneihna paihthlak sak tumna a ni lo tih an sawi a, Zirtawpni khan President Mugabe pawh hi mipui hmaah a inlan leh a ni.

TV-a thu a sawiah Mugabe chuan sipaite chu anmahni thuneihna inpe a, house arrest-a an hren chungchangah ihsual an nei lo niin a sawi. Kum 93 mi hian December thlaa Zanu-PF congress neih thleng chuan Zimbabwe ram hruaitu nihna dinhmun a chelh chhunzawm zel tur thu a sawi a ni.

Zanu-PF chuan Pathianni khan Mugabe hi party hruaitu a nihna aṭanga banin, amah thlaktu atan hian a deputy aṭanga a ban tak, Mnangagwa chu an ruat nghal a, kum 2018 inthlan neih tura an party president candidate turin an thlang nghal bawk. Zanu-PF party meeting-ah hian Mugabe-a nupui, Grace Mugabe leh party senior official eng emaw zat chu an party aṭangin an hnawtchhuak nghal bawk.