Israel President-in sipai dilna hnawl

Israel President Reuven Rivlin chuan Palestinian mi a thah avanga thla 18 tang tura hrem, Israel sipai Elor Azaria-an ngaidam tura a dilna chu a hnawlsak.

Kum 2016 March thla khan Israel mite beitu, Palestinian mi pakhat hliam tuar chu Elor Azaria hian a kaphlum a, hei vang hian thiam loh chantir a ni. January thla khan Prime Minister Benjamin Netanyahu chuan Azaria hi ngaidam turin alo ngensak tawh bawk a, thla hmasa khan Azaria hian ngaidam tura dilna hi President hnenah a thehlut a ni.

Azaria chungchangah hian Israel mipuite ngaihdan pawh a inang lo hle a, ṭhenkhatin Israel mite beitu Palestinian a kahhlum avang hian ngaihdam phuin an hria a, mahse ṭhenkhat erawh chuan hliam tuar leh engmah ti thei tawh lo, Palestinian mi a kahhlum vang hian hrem ngei phuin an hre thung. Palestinian mi a kahhlum hi Ramzi Aziz al-Qasrawi a ni a, Israel sipai chema a vih hnuah sipaite an kap hliam a, kawnga hliam tuar a tlu chu Azaria hian a kaphlum a ni. He thil thlen lai hian Azaria hi kum 19 mi a ni.

President office chuan Pathianni khan thuchhuah siamin, Elor Azaria dilna chu President Reuven Rivlin chuan a ngaihtuah hnuah a dilna hi a hnawlsak ta tih a tarlang.