China leh Myanmar-in Rakhine state buaina sawidun

China Foreign Minister Wang Yi leh Myanmar State Counsellor Aung San Suu Kyi-te chu Pathianni khan Nay Pyi Taw-ah inkawmin, Rakhine state buaina chungchang leh a chinfel theih dan turte an sawidun.

China minister chuan Rakhine-a sipaite beihpui thlak avanga Rohingya Muslim-te chunga harsatna thleng mek chu Myanmar leh Bangladesh sorkar te chuan sawidun a, an chinfel theih a beisei thu a sawi. Ram pahnihte hian inbiakna an neih theihna tura boruak ṭha tak lo siam chu ram dangte leh United Nations Security Council pawhin an lo ngaihtuah a ngai a ni, a ti.

Rakhine state buaina neih mek chinfelna tur chu thawh thuma kalpui a ngai niin China hruaitu chuan a sawi. A thawh khatna atan chuan Rakhine state aṭanga Rohingya te an tlanchhiat chhunzawm tawh lohna turin inkahhai puan phawt a ngai a ni, tiin Wang chuan a sawi. A thawh hnihnaah chuan Myanmar leh Bangladesh-ten inbiakna an neih theihna tura ramdangten boruak ṭha siam a, an lo nawr a ngai a ni, a ti. A thawh thumna atan chuan hun rei zawk daih tur buaina chinfel dan ngaihtuah a ngai niin a sawi bawk. Retheihna chu buaina inṭanna bul a ni tiin, Rakhine state-a retheihna umbo a nih theih nan ram dangte pawhin hma an lakpui a ngai niin a sawi.