Trump-an firfiak thlawp ramah NKorea a puang

US President Donald Trump chuan North Korea chu fifiak thlawp ramah an tel tih a sawi. He list aṭang hian NKorea hi kum kua kalta khan paih a lo ni tawh a, mahse an tel ṭha leh ta a ni.

President Trump chuan firfiak thlawp rama NKorea telh a nih leh tak avangin an ram hrekna tam zawh pawh siam belh a ni leh dawn a ni, a ti. Firfiak thlawpa puh a nihna chungchangah North Korea nuclear programme chu a bultumtu ber a nih thu a sawi a, a thutlukna chu a hma daiha lo siam tawh tur a nih thu a sawi bawk. NKorea chuan nuclear programme a kalpui hmangin khawvel a tiralkhel a, rawlrala chetna, ramdanga inthahna thlengin a thlawp a ni, a ti.

White House official-te chuan Malaysia airport-ah mi pakhat thahna leh, US mi Otto Warmbier thihna chungchangah NKorea chu mawhphurtuah an puh a, mahse hei hi NKorea chuan a pha thung. Warmbier hi American university zirlai a ni a, kum 2016 January thla khan NKorea an tlawh ṭumin man a ni a, kum 15 tang tura hrem a ni. Hun eng emaw chen a dam loh hnuah kumin June thla khan US-ah thawn haw a ni a, a thlen aṭanga ni ruk hnuah a thi a ni.

September thla khan US hian United Nations-ah NKorea ram hrekna tur rawtna a lo siam tawh a, heng zingah hian oil thawnluh khap leh, an ram hotu Kim Jong-un a thil neihte khawih chet theih loha dahsakte a tel. He hrekna hi NKorea-in missile a enchhin fo avang leh, a ṭum rukna atana nuclear test a neih leh vanga siam a ni.

US-in firfiak thlawptu ram list a siamah hian Iran, Sudan leh Syria-te pawh an tel a ni. Kum 2008-a George W Bush-a president lai khan North Korea nuclear programme titawp tura inbiakna an nei peng pakhatah list aṭang hian paih a lo ni tawh a ni.