Zimbabwe-ah VP hlui a kir dawn : SDF

Zimbabwe Defence Forces (ZDF) chuan ram danga himna zawnga tlanchhe mek, an ram vice president hlui Emmerson Mnangagwa chu Zimbabwe ramah a kir leh thuai dawn niin an sawi.

President Robert Mugabe chuan a vice president Emmerson Mnangagwa hi kar hnih liamta khan a ban a, a ban hnu hian Mnangagwa hi ram pawn lamah a tlanchhe zui a ni. Mnangagwa hi Mugabe thlaktu tura rinkai ber a ni a, mahse Mugabe hi a nupui Grace Mugabe-in a ai a awh theih nan a vice president hi a ban nia ngaih a ni. Hemi hnua hian Zimbabwe sipai-te chu rawn inrawlhin, kar kalta Nilaini khan an ram khawpui, Harare-a sorkar building leh hmun pawimawh dangte thununin thuneihna an inpe a ni. President Mugabe te nupa pawh an hreng zui bawk.

Kar kalta Zirtawpni khan Mugabe hi mipui hmaah a inlan a, president aṭanga bang tura nawr ni mah se a ban loh tur thu a sawi. Rorellai Zanu-PF party pawhin an party president a nihna aṭangin Pathianni khan an ban a, mahse Mugabe chuan December thlaa party conference neih tur thlengin hruaitu hna hi a chelh chhunzawm dawn tih a sawi. Mahse party chuan Mugabe hi a ban duh loh chuan Parliament-ah president a nihna aṭanga paihthlakna tur motion putluh an tum.

ZDF chuan an ram politics buaina chinfel a nih theih nan President Mugabe leh Vice President hlui Emmerson Mnangagwa te chu inbiakna nei turin an ngen a, sipai hotu Constantino Chiweanga chuan an inbiak dan azirin hma lak a ni ang, a ti. Chiwenga chuan ram mipuite chu boruak muanawm leh mipui nunphung tihchhe zawnga che lo turin a ngen bawk.

Thawhṭanni khan University of Zimbabwe zirlaite chuan nawrh huaihawtin, Mugage chu president a nihna aṭanga a ban hma chuan exam pawh an nei duh lo tih a sawi.