Israel Parliament member tharte lalut

Israel ram inthlanpui neih zawh taka Parliament member atana thlan tlin, mi 120-te chu Thawhlehni khan rinawmna thu tiam tira lakluh an ni.

Parliament, Knesset-a inkhawm buatsaihah president Isaac Herzog chuan mipuitem an aiawha rorel tura an thlante hi hi rimawn thu tiamtirin a lalut a ni. President Herzog chuan lawmaker-te chu lungrual tak leh inhriatthiamna ṭha tak nei tura chahin, sorkar ngel nghet a awm theih loh avanga kum li chhunga inthlanpui ṭum nga buatsaih a ngai chuan mipuite pawh a tichau zo tawh a ni, a ti. Buaina awmte titawp tura an mawhphurhte hrechiang tura chahin, hnam leh sakhaw tlem zawkte venghim ṭha turin a ngen bawk.

Parliament member thar lakluh zingah hian hmeichhia 29 an awm a, a ṭum khatna atan Arab Islamist party member pawh a awm ve bawk. A term khatna atana thlan tlin mi 23 awmin, an zinga a tam zawk hi Likud party mi an ni.

Kum 20 chhunga Knesset-a Arab lawmaker an tlem ber ṭum a ni dawn a, member 10 chauh an awm. Palestinian ram hran din thlawptu langsar, left-wing party Meretz chuan member a nei ta lo a, sorkarna lo siam reng tawhtu Labor party pawhin member pali chauh a nei pha.

President hian inthlana party mala seat la hnem ber, Likud party hotu, prime minister hlui Benjamin Netanyahu chu sorkar thar siam turin a sawm tawh bawk. Netanyahu hian an thawhpui party dangte chu ṭangrual sorkar siampui turin inbiakna a neihpui mek a ni.

Likud party leh a thawhpuite hian seat 120 awmna Knesset-ah hian seat 64 an nei a, majority an nei pha a ni.