Germany leh Spain-in Ukraine sipaite training pe dawn
Germany leh Spain chuan European Union programme hnuaiah, Ukraine sipaite chu an ram runtu, Russia sipaite an beiletna kawnga pui turin training an pek tur thu an sawi ve leh. EU ram dang ṭhenkhat chuan Ukraine sipaite hi training an lo pe tawh a ni.
EU hian indona hmachhawn tura UK sipaite training pekna turin, sipai 15,000-te tan military training mission a buatsaih dawn a, an hmunpui berah Ukraine ṭhenawm, Poland chu an hmang dawn a, secondary headquarters-ah Germany chu hman a ni bawk ang.
Germany defence minister Christine Lambrecht chuan Ukraine sipai 5,000 chu skill hrang hrangah training an pe dawn tih a sawi a, Spain defence minister Margarita Robles pawhin Ukraine sipai chu thla hnih danah 400 zel training pein, kum khat chhungin sipai 2,400 te trainin an pe dawn tih a sawi ve bawk. Training pekna tur hmun, Toledo-ah Ukraine sipaite awmna tur pawh hi a peih fel a ni tawh ti a sawi.
France chuan thla hmasa khan Ukraine sipai 2,000-te training an pek tur thu a lo puang tawh bawk. Hemi hma hian Britain, Canada leh US chuan Britain leh Germany-a US base-ah Ukraine sipaite hi training an lo pe tawh bawk a ni.
EU-in kum hnih chhunga Ukraine sipaite training pekna tur mission a buatsaihah hian kum khatah USD mtd 62 vel a seng dawn nia chhut a ni. An senso hi European Peaca Facility fund aṭangin pek a ni ang. EU hian Ukraine sipaite thuam chakna tur hian USD tld 3 chuang a lo hmang tawh bawk.