Mugabe-an banna a thehlut ta
Kum 37 zet Zimbabwe ram hruaitu dinhmun lo chelh tawh, Robert Mugabe chu bang tura nasa taka nawr a nih hnuah, Thawhlehni khan President a nihna aṭanga banna a thehlut ta.
Rorellai, Zanu-PF party chuan Pathianni khan kum 93 mi, Mugabe hi an party president a nihna aṭanga banin, Zimbabwe president a nihna aṭanga bang turin an ti bawk. A party bakah mipui nawlpui leh sipaite pawhin bang turin an nawr reng bawk a ni. Banna a thehluh duh loh chuan President
aṭanga paihthlak a nihna turin hma an la dawn tih an sawi. Mugabe hian ban a tum loh thu sawiin, December thlaa an party congress neih thleng hruaitu hna hi a chelh dawn niin a sawi a ni. Hei vang hian Thawhlehni khan Parliament-ah Mugabe-a banna tur hi buaipui ṭan a ni a, mahse hemi zan hian President hian a ban thu hi a puang ta a ni.
Thawhlehni zan khan Parliament speaker Jacob Mudenda chuan Mugabe-a banna lehkha thehluh chu a chhiar chhuak a, Parliament-a rorellai leh eptu party member-te chu lawmin an au a, kawtthlerah mipuiten Mugabe ban hi nasa takin an lawm bawk.
Mugabe hian kum 37 zet ro rel tawhin khawvela ram khat hruaitu upa ber a ni a, an ram mipui tam zawk chuan an ning tawh hle a, mahse bang tura nawr a nih pawhin Mugabe hian Pathian chauhin a ban thei niin a sawi ṭhin.
President aṭanga Mugabe a ban tak avangin a aiawh tur hian a deputy aṭanga a ban tak, Vice President hlui Emmerson Mnangagwa chu ruat a ni dawn tih an sawi. Mugabe-an vice president aṭanga a ban hnuah Mnangagwa hi ram pawn lamah a tlanchhia a, mahse nimin khan an ramah hian a kir leh hman beisei a ni. Mnangagwa hi vawiin hian president atan lakluh hman beisei a ni bawk.
Mugabe hian a thachhang dawltu ber, amah thlaktu tura rinkai Mnangagwa hi tun thla tir lam khan a ban a, hei hi amah thlaktu atana a nupui, Grace Mugabe-i ruat a nih theihna tura a ruahman nia ngaih a ni. Mnangagwa ban a nih vang hian tualchhung politics pawh a buai phah a, sipaite an inrawlh phah ta a ni. Sipaite hian an ram khawpui, Harare-a sorkar building pawimawhte thununin thuneihna an inpe a, Mugabe te nupa pawh hi an hreng zui a ni.
Robert Mugabe
1924 : Kutama-ah a piang
1964 : Rhoddesia sorkarin manin an tantir
1980 : Independence an neih hnua inthlanpui neihah a chak
1996 : Grace Marufu-i nen an innei
2000 : Ram danpui siamṭha a tumna a hlawhchham. Mugabe thlawptu helte chuan mingo ho farm leh eptu pawl thlawptute an bei
2008 : President thlan thawh khatnaah Morgan Tsvangirai-an hma a hruai laiin amah thlawptuten beih an tawh nasat avangin Tsvangirai a inhnukdawk
2009 : An ram sum dinhmun a tlachhe nasa hle. Tsvangirai chu praie minister atan a lalut
2017 : Hun rei tak a thawhpui tawh Vice President Emmerson Mnangagwa a ban. Tualchhung politics buaina thlengin sipaite an inrawlh zui ta a ni.