Agung tlang kang vangin mi tam tak tlanchhia

Indonesia-a Bali thliarkar-a Agung tlang chu kum 50 chuang hnuah a ṭum khat nan Thawhlehni khan a kang a, tlang bulṭhuta cheng mi tam tak chu himna zawngin an insawnchhuak.

Agung tlang kang tur inmung avang hian tunhnaiah mi 140,000 chuang zet chu an insawnchhuak hman a, Thawhlehni khan tlangchhip aṭang hian meikhu chu ft 2,300 zeta sang thlengin a invawrh chhuak a ni.

Kum 1963 khan Mount Agung kang vang hian mi 1,600 vel an lo thi tawh a ni. Kum 1883 khan Krakatoa-ah tlang kang vangin mi 40,000 zet an lo thi tawh bawk.

Tlang bul hnaia chengte hi August thla khan insawnchhuak tura tih an lo ni tawh a, mahse a hnuah an khaw lama an kir leh phalsak an ni. Mahse hemi hnu pawh hian tlang kang tur inmung thawm hi hriat tur a awm zui reng a ni. An khaw lama kir phalsak tawhte hi insawnchhuak tura tih an ni leh a ni.