Myanmar sipai sorkarin tang 6,000 chhuah dawn

Myanmar sipai sorkar chuan tang 6,000 vel a chhuah dawn a, an zingah hian British ambassador hlui, Japanese journalist leh Australian economics adviser pawh a tel dawn nia sawi a ni.

Sipaiten nikuma civil sorkar thuneihna an hnehchhuh hnu khan, ramchhungah sipai sorkar dodalna lantir a ni a, nawrh huaihawtte leh sipaite inkarah inbeihna pawh a thleng fo a ni. Sipaite hian thuneihna an chan hnuah mi 16,000 chuang an man tawh a ni. An mi man zinga tam tak hi 'National Day' pualin an chhuah dawn a, an zingah hian hmeichhia pawh 600 vel an tel dawn niin an tarlang.

Tang chhuah tura sawi zinga mi, British ambassador hlui Vicky Bowman hi kum 2002-2006 chhung khan ambassador a ni a, a hnuah Myanmar Centre for Responsible Business (MCRB) a enkawl zui a ni. August thla khan a foreigner registration certificate-a a address a ziahlan ni loah a cheng nia an sawi vangin, a pasal nen an man a, kum khat tang tura hrem an ni.

Aung San Suu Kyi-i economics adviser, Australia mi Sean Tunrell hi kum 2021, February thla khan man a ni a, Official Secrets Act hnuaiah kumthum tang tura hrem a ni.

Japanese journalist Toru Kobuta hi kumin July thla khan Yangon-a sipai sorkar duh lohna lantira kawngzawh neihna bulah man an ni bawk a, electronic communications law bawhchhiaa puhin kum 10 tang tura hrem a ni. Ani bakah hian sipaite hian journalist 68 vel an man tawh niin Reporters Without Borders chuan a tarlang.