Amnesty-in mi tang chhuah turin Sri Lanka sorkar a ngen

Rights group Amnesty International chuan Sri Lanka sorkar chu sorkar laka lungawi lohna lantirnaa hruaitu pahnih a mante chu chhuah tur leh, an laka thubuai a siamsakte sut turin a phut.

Sri Lanka sorkar hian university zirlai hruaitu pahnih, Wasantha Mudalige leh Galwewa Siridhamma-te chu manin, Prevention of Terrorism Act (PTA) hnuaiah thubuai rip tak a siamsak a, ni 90 chuang jail-ah a dah tawh a ni.

Amnesty International South Asia regional researcher, Thyagi Ruwanpathirana chuan awmze nei loa zirlai hruaitute thubuai siamsak chu sut tura sorkar phutin, an tan hun pawh pawhsei sak tawh lo turin a ngen.

Mudalige leh Siridhamma-te hi kumina sorkar laka lungawi lohna lantirna hrang hranga an lo tel ṭhin a, hetihlai hian sorkarin behchhan mumal nei loa thubuai rip tak a siamsak hi eptu pawl leh rights group hrang hrangte chuan an sawisel nasa hle. Tun hnaiah zirlai hruaitu pahnihte chhuah phut hian eptu leh rights activist-te chuan nawrh an lo huaihawt fo tawh a ni.

Kum tam tak chu eptu legislator, trade union leh civil right activist-te chuan sorkar chu PTA tibo tur hian an lo nawr tawh. Kumin March thla khan he dan hi siamṭhat ni mah se, eptu lam chuan awmze nei lo niin an sawi a, he dan hnuaiah hian thil dik lo tia rinhlelh chu warrant awm loin man leh tantir theih a ni a, inpuan tir tumin nghaisak an ni fo bawk. He dan hi Sri Lanka civil war era laia siam a ni a, hman sual a ni fo a, pawisawi lo mi tam tak chu he dan hmang hian an chungthu ngaihtuah sak loin kum tak tak tantir an lo ni tawh ṭhin.