Vawiin-ah Zimbabwe president thar lalut dawn

Zimbabwe vice president hlui, Emmerson Mnangagwa chu vawiin hian President thar atan lakluh a ni dawn.

Kum 37 zet Zimbabwe ram hruai hna lo chelh tawh, Robert Mugabe chuan rorellai party, Zanu-PF, sipai lam thuneitute leh mipui tam takin bang tura nasa taka an nawr hnuah Thawhlehni zan khan president a nihna aṭanga banna a thehlut a ni.

Mugabe-an banna a theh luh hnuah, Zanu-PF chuan amah thlaktu atan hian Mugabe-an vice president aṭanga a lo ban tawh, Emmerson Mnangagwa hi an ruat nghal a ni.

Kar hnih liamtaah khan Mugabe chu a thachhang dawltu ber leh amah thlaktu tura rinkai ber, kum 71 mi Mnangagwa hi vice president aṭangin a ban a, hei hi a aiawh tura a nupui Grace Mugabe-i dah a nih theihan tura tih a ni. Ban a nih hnu hian a himna atan Mnangagwa hi South Africa ramah a tlanchhe nghal a, hemi hnu hian Zimbabwe sipaite inrawlhin, Zimbabwe sorkar hmun pawimawhte lain an thunun zui a ni.

Mugabe-an banna a thehluh hnuah, Nilaini khan Mnangagwa hi an ramah hian a kir a, an ram khawpui Harare-ah mipui tam takin an lo lawm a ni. Zanu-PF headquateres-ah amah thlawptu mi tam takin lo hmuakin, Mnangagwa chuan buaina awm loa Mugabe ban a nih theihna atana an hmalakna kawngah Zimbabwe sipaite a fak thu a sawi.

Mnangagwa chuan an ram dinhmun siamṭhat a, democracy tundin a tiam a, ram mipuite tan hna tam zawk siam a tiam bawk. Zimbabwe ram mipui 90% dawn hi hna thawh nei lo nia chhut a ni.

Zanu-PF party thupuangtu chuan Mnangagwa hian Mugabe-a term la hman zawh loh a hman chhunzawm ang a, nakkum September thlaah inthlan buatsaih a ni dawn tih a sawi.