Saudi Arabia-in Yemen kawng dan thlahdul dawn

Saudi Arabia chuan Yemen-a helpawlte thunun bial kalpawhna kawng a dan chu chhawmdawlna thawnluh a nih theih nan a thlahdul dawn tih a sawi a, a hun erawh a la sawichiang lo.

Khawmual, tuipui leh van lam aṭanga Yemen kalpawhnate dan a nih vang hian Yemen mipuite harsatna nasa tak an tuar tawh a, thil man pawh a sang chak hle. Saudi Arabia chuan a kawng dan hi Houthi helho hrekna tura a tih ni mah se, mipui nawlpuiin an tuar nasa hle a ni.

Kum 2015 aṭang khan Saudi Arabia kaihhruai Arab ṭangrual ramte chuan Yemen sorkar thlawpin Houthi hel lakah beihpui an thlak ṭan tawh a ni. Houthi helten ballistic missile hmanga Saudi Arabia khawpui, Riyadh an kah avangin November 5 aṭang khan Yemen kalpawhnate hi an danchah sak a ni. Saudi Arabia chuan Houthi helte Yemen rama ralthuam tawlhluh an tum venna turin kawng dan hi a ṭul niin a sawi a ni. Iran ram chu Houthi helte thlawp a, ralthuama nena thuamah puh a ni a, mahse he puhna hi Iran chuan a pha thung.

Save the Children chuan kawng dan thlahdul a ni tur chu lawmawm a tih thu a sawi a, hemi rual hian ei tur mumal nei loa mi tam tak awm mekte harsatna sutkianna turin hei hi a tawk lo tih a sawi.

Tualchhung indona a thlen hma khan Yemen hian a ram mipuite wheat leh buhfai mamawh zinga 90% chu ram pawn lam aṭangin a lalut ṭhin. Heng a lakluh zinga 70% chu Hodeidah lawngchawlh hmun kaltlanga lak an ni. Mahse Hodeidah hi kum hnih dawn liamta atan khan Houthi hel kutah a awm tawh a, hei vang hian ei tur an lakluh pawh hi a tlahniam tawh hle a, mipui maktaduai tel chuan ei tur an tlachham tawh a ni, ei leh in lama chhawmdawl ngai mi tam tak an awm tawh a ni.