Zimbabwe President thar lalut

Robert Mugabe-an kum 37 zet Zimbabwe-a ro a relna chu titawpin,nimin khan President thar atan Emmerson Mnangagwa chu lakluh a ni ta.

President thar lakluh inkhawm hi Zimbabwe khawpui, Harare-a mi 60,000 lenna, Natonal Sports Stadium-ah neih a ni a, mipui tel an ṭhahnem hle. President thar lakluh inkhawmah hian Mugabe erawh a tel ve lo.

Zimbabwe president thar hi politics lam thila fing leh remhre tak nia sawi a ni a, a hmingah pawh 'the crocodile' tia vuah a ni ṭhin. Zanu-PF party-a a lamṭang pawl chu 'Lacoste' tih an ni. China leh Egypt-ahte military training a lo nei tawh a, kum 1960 leh 1970 chho khan Zimbabwe-in independence sual a beihnaah a lo tel tawh ṭhin. Kum 1980-a tual­chhung buaina an tawh lai khan sypmaster a ni a, he buainaah hian civil mi sang tel thah an ni a, mahse he thilah hian inhnamhnawihna a nei lo niin a sawi a, sipaite thiltih niin a puh. Kum 2008 inthlanpui neih hnua eptute beihna thleng kha a reltu leh ruahmantu ber nia puh a ni.

President thar Mnan­gagwa-a piankum dik tak hi hriat a ni lo a, mahse kum 75 mi nia hriat a ni.

Mugabe-an hremna pumpelh dawn:
Zimbabwe president hlui, Robert Mugabe chu president aṭanga a ban hnuah thubuai siamsak theih loh tura dah a ni dawn a ni.

Kum 93 mi, Robert Mugabe hi kum 37 zet Zimbabwe ram hruaitu a ni a, President aṭanga bang tura nasa taka nawr a nih hnuin Thawhlehni khan banna hi a thehlut a ni. Mahse banna a thehluh dawna inbiakna an neihah, thuneihna a chan loh hnuah pawh a laka thubuai siam leh hremna siamsak theih loh turin inremna an siam nia sawi a ni. Hei hi a kum a upat tawh vang nia sawi a ni bawk.

Mugabe hi hrem theih lohna, immunity pek ni dawn mah se a nupui, Grace Mugabe erawh pek a la ni ve lo a, pek a nih theih nan inbiakna neih mek nia sawi a ni. Grace Mugabe hian a hmain eiruk thubuai pawh a lo nei tawh a ni.

Eptu party lian ber, Movement for Democratic Change (MDC-T) thu­puangtu, Obert Gutu chuan an ramin boruak ṭha tak hnuaia hma lam a pan theihna turin hun liamtaa thil thlengte an buaipui zui loh a ngai tih a sawi.

MDC-T chuan Muga­be-a thlaktu, Emmerson Mnangagwa chuan an ram politics chhe lutuk tawh chu a siamṭhat a, Mugabe-a rorelna hnuaia an ram dinhmun tlachhe tawhte pawh a siamṭhat leh theih an beisei thu a sawi.