Myanmar leh Bangladesh inrem

Myanmar leh Bangla­desh chuan Rohingya raltlante an khaw lama an kir lehna tura thawhdunna tur inremna an ziak ta.

Myanmar state coun­selor office chuan ram pa­hnihten inremna an ziah thu hi sawiin, Myanmar aiwhin Union minister for Office of State Counselor U Kyaw Tint Swe leh Bangladesh aiawhin foreign affairs minister Abul Hassan Mahmood Ali-ten hming an ziak tih a sawi.

August 25-a Myanmar sipaiten an ram hmarlam, Rakhine state-a Rohingya helte laka beihpui an thlak aṭang khan Rohingya Muslim mi tam tak chu Bangladesh ramah an tlanchhia a ni. Bangladesh-a raltlan lut hi 620,000 an tling tawh a ni. Sipaiten beihpui an thlaknaah hian civil mite pawh an thliar lo a, Rohingya te chenna khuate an halsak bakah, hmeichhiate pawhin pawngsual an tawk nasa hle nia sawi a ni. Ram hrang hrangin Myanmar sipaite chetdan hi an dem thu an sawi a, State Counselor Aung San Suu Kyi-i pawh Rohingya-te thlavang hauh zawnga a ṭawng chhuah loh avangin dem a hlawh phah hle.

Myanmar sipaite chet dan hi Rohingya hnam thenfai tumna niin an puhsak a, mahse sipaite chuan security force-te beitu, Rohingya helte chauh an bitum niin an sawi. Myanmar chuan Rakhine state-a sipaite chetdan a chhuinaah, civil mite khaw halsak, nghaisak leh pawngsualte a thleng lo niin a sawi a, mahse he report hi human rights group chuan sawiselin an pawm lo tih an lo sawi tawh a ni.