Khawvel pumah Covid-19 kai Mi mtd 4 chuang tawh
Khawvel puma Covid-19 kai chu nimin khan mi 41,15,559 an tling tawh a, he hri vanga thi hi mi 2,80,594 an awm tawh bawk a ni.
US chu khawvela Covid-19 hri kai tamna ber leh he hri vanga thi tamna ber ram a la ni zel a, US-a he hri kai zat hi mi 13,47,318 an awm mek a, he hri vanga thi hi mi 80,040 an awm tawh. Khawvela he hri kai enkawl dam tawh hi mi 14,46,229 an awm bawk.
Hri kai thar hi la awm zel mah se ram ṭhenkhatah chuan he hri kai punna hi a tlahniam ve zel a, Europe rama a tuar nasa ber ram zinga mi Italy leh Spain pawh a hma ai chuan a ziaawm chho tawh a ni. Mithiamte chuan hri kai hi a la pun chho zel an ring thung a, hri test-na hi ram ṭhenkhata an la neih tam tawk loh vangin hri kai zat punna hi a la tam loin angin a lang mai niin an sawi.
Brazil-ah Covid-19 vanga thiteni thum sun dawn
Kar liam ta Inrinni khan Brazil Congress chuan thuchhuah siamin, an rama Covid-19 vanga thi mi 10,656-te chu ni thum chhung sun an ni dawn tih a sawi.
Brazil-ah hian coronavirus kai hi mi 1,56,061 an awm tawh a, heng zinga mi 61,685 te chu enkawl dam tawh an ni.
Russia-ah hri kai thar nuai hnih chuang tawh
Russia ramah Inrinni khan hri kai thar mi 11,012 awm lehin, hri kai hi mi 2,09,688 an tling tawh. Inrini vek khan hri vang hian mi 88 thiin, mi 1,915 in an thihpui tawh a ni.
Russia hi hri kai tam lamah France leh Germany te a pel tawh a, khawvela coronavirus kai tamna ram pangana a ni tawh a ni.
Moscow-a Covid-19 kai enkawlna damdawiin pakhatah nimin khan kangmei a chhuak a, mi pakhat a thi. Damlo enkawl lai mi 200 te chu hmun dangah sawnchhuah nghal an ni.
South Korea-ah hri kai pung thar
South Korea-ah nimin khan coronavirus kai thar mi 34 hmuh an ni a, hei hi thla khat chuang hnuan nikhata hri kai thar an tam ber ṭum a ni.
Korea Centers for Disease Control and Prevention (KCDC) chuan hri kai hmuh thar zinga 26 hi ramchhung aṭanga an kai tih sawiin, mi pariat chu ram pawn aṭanga lut an ni tih a sawi.
South Korea-ah hian ni 10 chhung chu ramchhung aṭanga hri kai thar an awm tawh lo a, hun eng emaw chen chu ram pawn aṭanga lut hri kai hmuh pawh nikhatah mi 10 an chuang tawh ngai lo a ni.
Nimina mi 30 chuang zet hri kai hmuh thar an nih leh avang hian mipuite chu chiai lo turin president Moon Jae-in chuan a chah a, hemi rual hian hri leng laka inveng tura leh, tha thlah lo turin a chah nghal bawk.
Kumin kumtawp lamah hri leng hi a thawh hnihna a thleng leh thei tih sawiin, hri hi a bo vek hma chuan inralring rengin, tha thlah loin an bei zel dawn tih a sawi.