Myanmar sipaiten inkahhai puang

Myanmar sipaite chuan nimin aṭang khan thla thum chhung atan helpawlte lakah inkahhai a puan chu a hmang ṭan. Inkahhai puan hian helpawl ṭhenkhat a huam tel lo thung a, heng zingah hian Arakan Army (AA) te pawh an tel. 

Kar liam ta Inrinni zan khan Myanmar sipai, Tatmadaw hian August 31 thleng atan inkahhai an puang dawn tih an lo sawi tawh a ni. Sipaite hi inkahhai an puan chhan leh hmun ṭhenkhatah beihpui thlak chhunzawm a la nih tur chhan pawh an sawichiang lo. 

AA leh a thurualpui dangte hian kumin March thla khan sorkar sipaite laka inkahhai hi an lo puang tawh a, mahse hetichung hian an inbeih chhunzawm reng tho a ni.