N Korea-in Ballistic missile a kapchhuak leh

North Korea chuan nimin khan intercontinental ballistic missile (ICBM) nia hriat chu a kapchhuak leh a, Japan ram bul km 200 vel chauha hlaah a tla.

Japan official-te chuan NKorea missile kahchhuah hi US ram laili pawh kap pha niin an sawi. Japan khawthlang lam, Hokkaido-a Oshima island aṭanga km 200 vela hla tuipuiah a tla tih chief cabinet secretary Hirokazu Matsuno chuan a sawi.

Japan prime minister Fumio Kishida chuan nimina NKorea missile kahchhuah hian thil tihchhiat a nei lo tih a sawi a, mahse NKorea-in missile a enchhin fo hi an enliam mai mai tawh dawn lo tih a sawi nghal.

South Korea president Yoon Suk-yeol pawhin NKorea missile kahchhuah chu a dem thu sawiin, US leh Japan nena security lama thawhhona ṭha zawk an neih leh, defence lam thuam chak a ṭul thu a sawi.

US state department-in a chhut danin, nimina NKorea missile kahchhuah hi kumin ICBM a enchhin ṭum riatna a ni. ICBM-te hi nuclear ralthuam phur thei niin, US thleng pawh kap pha an ni. NKorea hian Ningani khan short-range missile a lo enchhin tawh bawk a, an ram foreign minister Choe Son Hui chuan US-in SKorea lama sipai a dah belh zel a nih chuan sipai chakna hmanga na taka chhanletah a vau.

Choe hian US, SKorea leh Japan-ten Pathiannia summit an neih chu a dem thu a sawi bawk. He summit-ah hian ram pathum hruaitute chuan Korea-in ralthuam a enchhin fo chu an dem thu sawiin, security lama thawhhona lian leh ṭha zawk siam an rel a ni.