Iran FM-in an rama tualchhung indona thlen­tir tumah Israel puh

Iran foreign minister Hossein Amirabdollahian chuan Israel leh khawthlang ram dangte chu Iran ram ṭhendarh a, tualchhung indona thlen tir tumah a puh.

Minister Amirabdollahian chuan a twitter-ah, "Security service hrang hrang, Israel leh khawthlang ram politician-te chuan Iran ram tihchhiat a, civil war thlen tir tumin an ruahman a ni. Mahse Iran chu Libya leh Sudan-te anga an tih thei a ni lo," tiin Iran mipuite an hmelma inbumtir lo turin a chah.

Iran ramah hian hijab hman dan zawm ṭha lo puha man, hmeichhe pakhat chu police kuta a awm laia a thih avangin ram chhung hmun hrang hrangah lungawi lohna lantir a ni. Nawrh huaihawt hi punlun zelin, sorkar laka lungawi lohna lantirna atan an hmang zui tawh a ni. Hetih lai hian Iran thuneitute chuan an rama tualchhung buaina thlengah ramdang chu inrawlha an puh. Nawrh huaihawtte leh police-te inkara buaina chhuakah, nawrhnaa tel zinga mi 362 an thi tawh a, mi 16,033 man an ni tawh bawk.

Rights group-te sawi danin, security force-te chuan nawrh huaihawta pungkhawmte lam hawia silaite an hmehpuah thu sawiin, kut an thlak nasa hle niin an tarlang.