Pakistan-in Army Act siamṭhat a tum

Pakistan sorkar chuan Army chief ruat chungchangah Prime Minister hnena thuneihna sang zawk pek theihna turin Pakistan Army Act,1952 siamṭhat a tum.

Defence minister Khawaja M Asif chuan sorkarin dan hi siamṭhat a tum thu a sawi a, mahse sipai hotu lu general Qamar Javed Bajwa pension dawn hnaihah he dan hi siamṭhat tum a nih avangin media lamah sawizui a hlawh hle. General Bajwa hi chhawr chhunzawm zel a nih theihna tur an zawng ni tein an tarlang.

Minister chuan kum 2019-a Supreme Court thuchhuak angin dan siamṭhat hi a ngai tih a sawi a, hetih laia a ni lo zawnga media lamin an sawi vak chu thil ṭul lo tak a ni, a ti. Dan hi thlak danglam vak a ni dawn lo a, clause ṭhenkhat chauh siamṭhat a ni dawn a ni, a ti.

Pakistan army Act siamṭhat dan tura rawtnaah hian Prime Minister chu hriattirna thuchhuah a siam hmangin Army chief ṭanglai chu chhawr chhunzawm tura thuneihna pek tum a ni.

An dan hmanlaiah chuan sipai hotu chawl tawh tur, chhawr chhunzawm leh a nih dan chuan PM hian ram danpuiin kaihhruaina a siam anga kalpui a, President pawhin a pawmpui phawt a ngai. Dan siamṭhatna tur hi thla hmasa khan defence ministry chuan a lo pawm tawh a ni.