Sorkar laka lungawi loh vanga mante Iraq PM-in chhuah dawn

Kar liam ta Nilainia Iraq prime minister thar atana lakluh tak, Mustafa al-Kadhimi chuan nikum October thlaa an rama sorkar laka lungawi loa nawrh huaihawt ṭum mante chu chhuah zalen an ni dawn tih a sawi.

PM al-Kadhimi hoin kar liam ta Inrinni khan Iraq sorkar thara cabinet meeting hmasa ber chu neih a ni a, meeting zawh hnua chanchinthar thehdartute hmaah al-Kadhimi chuan nikuma sorkar laka lungawi loa nawrh huaihawt sorkarin a man, jail-a a dah mi 550 chuang chu chhuah an ni dawn tih a sawi a ni.

Nikuma buainaa thite hnenah zángnadawmna pawh pek a nih dawn thu al-Kadhimi chuan a sawi bawk. Nikum October thla tir aṭang khan Iraq khawpui Baghdad leh khawpui dangah sorkar lakah mipuite chuan lungawi lohna an lan tir a, an lungawi loh chhan ber hi an ram sorkar eiruk nasat vang te, electric leh tui a mumal loh vang te, hna nei lo an tam avang te, economy a tlakchhiat mai bakah vantlang mipui tana sorkarin hamṭhatna a ngaihthah vangtein sorkar laka mipuite chu an lungawi lo a, an ram khawpui hmun hrang hrangah nawrh an huaihawt phah ta a ni.

Mipuite lungawi lohna avang hian PM hlui Adil Abdul-Mahdi chuan nikum November 29 khan PM a nihna aṭangin a lo bang tawh bawk a ni. Nikuma nawrh huaihawtte leh security force-te inbeihnaah khan mi 2,000 vel an thi a, mi 2,700 chuangin hliam an tuar bawk.