Malaysia inthlanah sorkar siam thei awm lo

Malaysia ram inthlanpui neih zawh takah an ram political history-a a ṭum khat thlenna turin, sorkarna siam thei tura chak zo an awm lo.

Anwar Ibhramin kaihhruai eptu ṭangrual pawl, Pakatan Harapan (PH) chuan seat la hnem berin, Parliament seat 222 awmah seat 82 an la a, mahse sorkar siamna tur seat neih ngai zat erawh an nei pha lo a ni. Prime minister hlui Muhyiddin Yassin kaihhruai, Perikatan Nasional (PN) chuan seat 73 an la ve bawk.

Prime minister Ismail Sabri Yaakob-a kaihhruai rorellai, Barison Nasional (BN) ṭangrual pawl an che ṭha lo hle a, seat 30 chauh an la a ni. Malaysia-in independence a hmuh hnu inthlana BN an chet ṭhat loh ber ṭum a ni.

Anwar leh Muhyiddin chuan an kaihhruai ṭangrual pawl chuan sorkar siam turin Parliament member thlawptu an ngah tawk niin an sawi ve ve a, mahse party hming leh member hmingte erawh an sawilang lo.

Hetih lai hian Anwar chuan Malaysia lal, King Al-Sultan Abdullah hnenah ṭangrual sorkar a siam theih tur thu hi ziakin a thlen dawn tih a sawi. An thawhpui tur party hmingte pawh chiang takin a tarlang dawn tih a sawi bawk. Anwar hi mahni anpui kawpa puh chungchangah thiam loh changin jail-ah tantir a lo ni tawh a, kum thum a tan hnuah kum 2018 khan jail aṭangin chhuah a ni.