Kherson-a chengte thiarchhuah hna ṭan thuai dawn : Ukraine Deputy PM

Ukraine chuan tunhnaia Russia sipaiten an chhuahsan, Kherson khawpui leh a bulhnaia chengte chhan­chhuah hna a thawk ṭan dawn tih Ukraine deputy prime minister Iryna Vereshchuk chuan a puang. Russia sipaiten an infrastructure-te nasa taka an sawpchhiat sak avangin mipuite tan khawsak a harsat tur thu a sawi.

Russia sipaite hian Kherosn an chhuahsan hnuah, Inrinni tlai khan he khawpuia oil dahṭhatna chu missile-in a kap fuh a ni. Khawpui an chhuahsan aṭanga kar khat liam hnuah an beih lehna hmasa ber a nih thu official-te chuan an sawi bawk.

Vereshchuk-i chuan Kherson khawpuia chengte tan khawsak a harsat em avangin mi tam tak chuan chhuahsan an duh thu a sawi Hei vang hian khawpuia cheng, hmun danga insawnchhuah duhte thiarchhuah hna hi thawh ṭan thuai a ni ang, a ti. Sorkar chuan mipuite thiarchhuahna tura ṭulte chu a buatsaih vek tawh a ni tiin. Khawpui chhuahsan duh zinga a tam zawk hi kum upa lamte leh, Russia-in a khawpui a bomb nghawng tuarte an nih thu a sawi bawk.

Ukraine thuneitute chuan Russia sipaite chu Kherson khawpui an chhuahsan hmain infrastructure pawimawh ho chu tum reng vanga tichhe luiah a puh. Tualchhunga thuneitute pawhin, Russia sipaite chuan fire truck leh ambulance an ruksak tih a sawi a, kangṭhelhhna thawktute chuan missile leh thil dang beihna dang hmachhawn turin hmanrua an tlakchham thu an tarlang.

UKraine president Volodymyr Zelenskyy leh official dangte chuan Russia hian mipui hrekna kawng khat atan power station-te chu an tichhia a ni tiin, Ukraine mi tam tak chu khawthlang lamah an pem a ngaih phah a, chu chuan European Union tan raltlan ṭhahnem tak a siamsak tih an sawi.

Artillery hmanga inbeihnaah Russia sipai 60 an thi
Ukraine chuan long-range artillery hmanga beihpui an thlakna­ah Russia sipai 60 vel an thi tih a sawi.

Ukraine armed forces general staff sawidanin, an ram sipaite hian kar liam ta Ningani khan Kherson chhim lam km 40-a hla, Mykhailkva khuaah beihpui thlakin, Russia sipai ṭhahnem tak an thi niin a sawi. Russia defence ministry chuan hemi chungchangah hian thuchhuah an la siam lo thung.

United States chuan Ukraine sipaite hman tur hian km 80-a hlaa target kapfuh thei, advanced rocket systems ṭhahnem tak a lo thawn tawh a ni. Ukraine chuan kar hmasa kar tir lam khan heng ralthuam hmanga Denezhnykove khuaa Russia sipaite an beihnaah, Russia sipai 50 vel an thi niin a sawi bawk.