Israel PM thar tur Netanyahu-a'n defamation case-ah hnehna chang

Israel prime minister thar tur, Benjamin Netanyahu chuan PM hlui Ehud Olmert-a laka defamation case a thehluhah thiam a chang.

Tel Aviv judge chuan nimin khan he case-a thutlukna hi siamin, Olmert chu Netanyahu-te chhugn rilru lam harsatna nei tia a sawi avangin an hming a tichhiatsak tiin, thiam loh a chantir a ni.

Olmert hi kum 2006 khan Israel PM atan lakluh a ni a, mahse eirua puh a nih avangin kum 2009 khan a bang a ni. A ban kumah hian Netanyahu hian a rawn thlak zui nghal a, an pahnih inkar hi a ṭha lo zui hle.

Nikum April thla interview a neihah, Olmert chuan Netanyahu bakah a nupui Sara leh a fapa Yair-te chu rilru lam harsatna neiah a puh. Netanyahu chuan amah leh a chhungte tihhmingchhiat tuma puhin Olmert hi a khing zui ta a ni.

Olmert chuan a ngaihdan a sawi mai niin Court-ah hian sawifiah leh a, mahse court chuan judge Amit Yariv chuan rilru harsatna nei tia inpuh chu thil zahthlak tak leh inhmusitna lian tak, ngaih zam mai chi a ni lo tiin Olmert chu thiam loh a chantir a, shekel 62,500 (USD 18,000) chawi turin a ti.

November 1-a Israel inthlanpui neihah, Netanyahu-a party Likud party leh a thawhpuite chuan hnehna changin, ṭangrual sorkar siam tumin an inbe mek a ni. Likud party leh a thawhpui ultra-Orthodox Jewish party pahnih bakah extreme-right Religious Zionism hian Israel parliament-a seat 120 awmah seat 64 an nei pha a ni.