Indonesia-ah magnitude 5.6-a na in lir a nghing
Indonesia-a West Java province-ah nimin khan magnitude 5.6-a na in lir a nghing a, lirnghingin chhiatna a thlenah mi 44 an thi.
West Java-a Cianjur local administration thupuangtu Adam chuan mi 44 vel an thih bakah, hliam tuar mi 300 vel an awm tih a sawi a, thi leh hliam zat hi a la punchhoh a rinawm thu a sawi nghal bawk.
Nimina lirnghing inṭanna hi Indonesia khawpui, Jakarat chhimchhak lam km 75 vela hla, Cianjur-a lei hnuai km 10 vel a ni tih weather and geophysics agency (BMKG) chuan a tarlang. Chenna in eng emaw zat a chhia a, Islamic boarding school pawh a chhe tel bawk. Lirnghinin thil a tihchhiat zat hi enfiah mek a la ni. Magnitude 5.6-a a nghin hnuah, darkar hnih chhungin aftershock hi ṭum 25 vet zet a thleng niin BMKG chuan a tarlang.
Indonesia ram hi 'Ring of Fire' a awm niin, lirnghing, tlang kang leh tsunami te a thleng fo a ni. Kumin February thla khan West Sumatra province-ah magnitude 6.2-a nain lir a nghing a, mi 25 an thi a, mi 460 chuang an hliam. Kum 2021 January thla khan West Sulawesi province-ah magnitude 6.2-a nain a lo nghing tawh bawk a, mi 100 chuang an thih bakah hliam tuar 6,500 vel an awm.