Thla 6 hnuah China ramah Covid-19 vanga thi awm leh

China ramah Covid-19 hri kai thar an pung chho zel a, Pathianni khan Beijing-ah Covid-19 hri vanga thi mi pakhat awmin, hei hi thla ruk hnuah hripui vanga thi an awm lehna hmasa ber a ni.

Beijing khawpuiah hri kai thar hi Pathianni khan mi 516 an awm belh leh a, hri darh tur venna atan khuahkhirhna thar siam lehin, school-te chu online hmanga kal tir an ni a, office-te kharin khawpui chhunga district lun ber, Chaoyang-ah restaurant-te khartir an ni bawk.

Kar liam ta Inrinni khan China ram pumah hri kai hmuh chhuah thar hi mi 24,473 awmin, Pathianni khan mi 24,435 an awm a ni.

Beijing Municipal Centre for Disease Control and Prevention deputy director, Liu Xiaofeng chuan Beijing khawpuia hri kai thar chu tam lutuk la ni lo mah se, hri darh zel tur venna atan awmze nei taka hmalak nghal a ṭul niin a sawi. Hei vang hian mipui punkhawm tamna te tihtlem a, kawthler leh hmun danga puipuina siam ṭhinte thunun leh ven a ngai a ni, a ti. Khawpui chhunga district 16 zinga a tam zawk chuan mipuite chu district danga an kalte titlem tur leh, a ṭul tawp loah chuan zin chhuak lo turin an ngen.

Pathiannia hripui vanga thi tih loh, China rama Covid-19 hri thihpui chhinchhiah hnuhnungte chu May 25 leh May 26-a Shanghai-a thite an ni.