Russia-in an sipai thattute hremna pek a tiam

Russia chuan Ukraine rama Russia sipai inpete, an inpek hnuah kahhlum an ni chu a dem thu sawiin, an sipai thahtute chu hremna a pek ngei tur thu a sawi.

Ukraine sipaite kuta Russia sipai ṭhenkhat inpete chu kahhlum an ni a, heng sipaite ruang thlalak hi kar liam ta khan social media lamah a darh a ni.

Hetih lai hian Ukraine chuan Russia sipaite hi an inpek hnua kahhlum an ni lo tih sawiin, anmahni bum nan an inpe der a, a hnuah an inbeihnaah kahhlum an ni zawk niin a sawi thung.

Mahse Russia lam chuan Ukraine thusawi hi an pawm lo a, Russia Parliament Kremlin thupuangtu, Dmitry Peskov chuan he pawikhawihna thlentute chu Russia chuan a zawngchhuak ngei dawn a, hremna a pe dawn a ni, a ti. Eng kawng pawhin hetiang pawikhawihna thlentute zawnchhuah a tum tih Russia chuan a sawi.

United Nations pawhin Russia sipai kahhlumte video darh chu an enfiah mek tih a sawi ve bawk.

Social media lama video darhah hian Russia sipaite chu Ukraine sipaite kutah inpein, in pakhat hnung lama leiah an bawk a, a hnu lawkah silai puak ri hriat zui a ni. Video dangah sipai inpete ruang, thisen nena inchiahpiah nuai hi a lang zui leh bawk.

Russia Human Rights Council chuan he thil thlenna hmun hi Ukraine khawchhak lam, Lugansk biala Makivka khua niin a sawi. He khua hi Ukraine sipaite chuan kar liam ta khan Russia kut aṭangin an la let niin an sawi a ni.