Malaysia lal-in PM thar tur a thlang dawn

Malaysia ram inthlanpuiah sorkar siam thei tura party mala chak zo an awm loh avangin, an ram lal King Al-Sultan Abdullah chuan prime minister thar tur hi a thlang dawn tih a sawi a, a hun tur erawh a la sawi chiang lo.

Inthlanpui neih zawh takah eptu pawl hruaitu Anwar Ibrahim kaihhruai leh, prime minister hlui Muhyiddin Yassin kaihhruai ṭangual pawlte chuan sorkar siam tura seat neih ngai zat an nei pha lo ve ve a ni.

King Abdullah hian nimin tlai khan ṭangrual sorkar siam tur hian hruaitu pahnihte hi hun a pe a, mahse Barisan Nasional chuan Anwar kaihhruai leh Muhyiddin kaihhruaite hi an thlawp dawn lo ve ve tih a sawi avangin, majority nei thei an awm ta lo a ni. Hei vang hian lal hian PM thar tur hi a thlan a ngai dawn ta a ni.

PM thar tur hi a thlan thuai tur thu King Abdullah chuan a sawi a, hemi rual hian Malaysia mipuite chu eng sorkar pawh pawm turin a ngen nghal bawk.

Anwar leh Muhyiddin hian sorkar siam turin thlawptu an ngah tawk niin an lo sawi ve ve tawh a, mahse anmahni thlawptu tur an tihte erawh an sawilang lo. Anwar kaihhruai ṭangrual pawl hian seat 82 lain, Muhyiddin kaihhruai hian seat 73 an la. Sorkar siam tur hian Parliament-ah seat 112 tal an neih phak a ngai thung.