Egypt mosque beihnaa thi mi 305 an tling

Egypt-a North Sinai-ah kar kalta Zirtawpni khan firfiakten mosque an bei a, he pawikhawihna thleng vanga thi hi nimin thleng khan mi 305 an tling tawh. Thi zingah hian naupang 27 an tel. Mi dang 128 in hliam an tuar bawk.

Egypt general prosecutor chuan Zirtawpni zinga Rawda mosque-a ṭawngṭaina hun hman laiin firfiakte hian an bei niin a sawi a, mosque beitute hi mi 25-30 vel an ni.

Mosque-ah hian ṭawngṭai tura kalkhawmte hmaah thusawituin thu a sawi ṭan chiah tihin, firfiake hian tukverh leh kawngkharte an bomb a, mosque hi hualin a chhunga inkhawmte chu an bei zui nghal a ni. An zinga ṭhenkhat chuan hmai tuamin, mosque chhungah hian flag keng lutin, an flag kenah hian "Allah leh Mohammed tih loh chu Pathian dang a awm lo" tih an ziak a ni. Mosque-a inkhawm, beih tawk zinga a tam zawk hi Sufi an ni.

Egypt President Abdel Fattah al-Sisi chuan mosque beih a ni chu a dem thu sawiin, pawikhawihtute chu hrem an nih ngei theihna turin na taka beih let an ni dawn tih a sawi. President chuan mosque beihnaa thi te chu ram pumah ni thum chhung sun an nih tur thu a puang bawk.

Pawikhawihtute zawn hna thawkin, security force-te chuan beihpui an thlak zui nghal a ni. Sipaite chuan mosque beihnaa mawhphurtua puh, IS firfiakte hmunte chu an bei nghal tih an sawi. Islamic State (IS) chuan mosque beitu an nih thu sawi lo mah se, a mawhphurtu bera ngaih an ni.

Kum 2013 July thlaa Egypt sipaiten President Mohammed Morsi an paihthlak hnuah khan, Islamist firfiak, Islamic State (IS) firfiak pawl nena inzawm, Sinai Province group chuan Sinai-a pawikhawihna an thlen fo a, he pawl pawikhawihna thlenah hian police, sipai leh civil mi tam tak an thi tawh a ni. Sinai Province hian ramchhung hmun danga Coptic Christian te pawh an bei fo a, hei bakah hian kum 2015-a Russia thlawhtheihna bomb tu an nih thu pawh an sawi. He thlawhtheihna bomb a nih vang hian thlawhtheihnaa chuang mi 224 an thi a ni.