Pope-in Myanmar a tlawh dawn

Roman Catholic kohhran hotu, Pope Francis chuan vawiin hian Myanmar a tlawh dawn a, pope ni tawh zinga Myanmar ram tlawh hmasa ber tur a ni ang.

Buddist ram, Myanmar-ah hian Roman Catholic chu a ram mipui zinga 1% vel chauh an ni. Pope Francis hian May thlaa Myanmar hruaitu, Aung San Suu Kyi-i nen an inhmuh hnu khan Myanmar ram tlawh hi a tum a ni. Thutlukna hi Myanmar-a Rohingya Muslim chungchanga buaina a thlen hmaa a lo siam tawh a ni.

Tun hnaiah Myanmar hi Rohingya buainain a chiah hneh hle a, ram hrang hrang pawhin Myanmar sorkar demna an sawichhuak fo a ni. Hetih lai hian Myanmar official-te chuan Pope hian an ram a thlen hunah pawh a ṭawngkam hmante fimkhur turin an ngen nia sawi a ni.

Myanmar cardinal Charles Maung Bo leh UN secretary general hlui, Rakhine state buaina chungchang chhuitu commission hotu, Kofi Annan-te chuan Pope hnenah hian Rohingya tih ṭawngkam chu hmang lo turin an ngen a, hei hi Myanmar sorkar hotute tihlawm loh an hlauh vang te, an tihlungawi loh chuan sakhaw tlem zawk Kristian leh Muslim te chungah a nghawng a lan leh an hlauhthawn vang nia ngaih a ni.

Myanmar-a Catholic charity lian ber, Karuna Mission Social Solidarity national director Win Tun Kyi chuan, Myanmar ramah chuan harsatna hrang hrang thleng a tam a, pakhat chauh sawichhuah bik chu a fuh ber loh a rin thu a sawi.

Pope hian naktukah Aung San Suu Kyui leh Myanmar president Htin Kyaw-te chu Naypidaw-ah a hmu dawn a, Nilaini-ah Buddhist hruaitute hmuin, Yangon-ah mass a buatsaih bawk ang.