Buainaah Mi 200 chuang inhliam

Pakistan khawpui, Islamabad-a sakhaw pawl ṭhenkhatin kawngpui an dan avanga buaina chhuakah mi 200 chuangin hliam an tuar.

Mipui pungkhawmte hian Islamabad pawhtu kawngpui pawimawh, Faizabad Interchange-ah sit-in protest an huaihawt a, hei hi Muslim sakhua zah loha puh Law Minister Zahid Hamid ban tir tura an phut vang a ni. Hun eng emaw chen kawngpui an dan hnuah thuneitute chuan nawrh huaihawtte hi hnawhdarh an tum a, mahse anni hian an lo dodal avangin buaina a chhuak ta a ni.

Pungkhawmte hnawtdarh tur hian elite police leh paramilitary force 8,500 vel tirh a ni a, tear gas leh rubber bullet-te an hmang a, mahse mipui pungkhawmte hian lo bei letin lungten an lo tawng a ni. Buaina chhuak vang hian dan leh thupek kenkawh a nih theih nan sipai a ko lut nghal a ni.

Nawrh huaihawtte hi Tehreek-i-Labaik Ya Rasool Allah Party a ni a, law minister hian electoral oath siam tharah Prophet Mohammad hming a tilang tello niin an sawi. Minister chuan heihi tihsual palh a nih thu sawiin thupha a lo chawi tawh a ni.