Tuihnuai lawng zawng zel

Argentina Navy-te chuan November 15 aṭanga chin hriat loha bo, Navy tuihnuai lawng ARA San Juan chu zawn chhunzawm zel a nih thu an sawi.

Tuihnuai lawng zawnnaah hian ram dangte pawhin an pui a, mahse tun thlengin a chin hriat a ni lo. He lawnga thawk mi 44 chhungte chuan kum 34-a upa, lawng hi a dinhmun a ṭha lo hle niin an sawi a, mahse Navy lam thuneitute chuan lawng hi a ṭha a, training mission-a a chhuah dawn pawhin system safety check pawh a paltlang niin an sawi.

ARA San Juan hi UK, Brazil, Chile, Norway, Germany, Canada, France, Peru, Colombia leh Uruguay-te chuan an zawnpui a, Russia pawhin Inrinni khan zawnpui tur hian a aircraft lian ber zinga mi a tir a, US pawhin unmanned mini-sub vehicle a tir bawk. Argentina tuihnuai lawng hi Ushuaia-a training mission-a kal a kir lam chu a khawl lamah harsatna a tawk nia sawi a ni. Naval commander chuan an harsatna tawh hi report-in, a battery-ah short circuit a awm tih a sawi a ni. Mahse Navy chuan a hnuah an biak lehin an buaina chu chinfel a nih thu leh, lawng pawh hi lawngchawlh hmun lam pana a kal tur thu an dawng niin an sawi. Mahse November 15 aṭang khan an bepawp zui thei ta lo a ni