Hmeichhie himna tur dan siam dawn

Turkey President Recep Tayyip Erdogan chuan an ram hmeichhiaten kutthlak leh mipat hmeichhiat lam hawia chhaih leh khawih an tawh ṭhin venna dan tur chu sorkarin a siam dawn tih a sawi.

International Day for the Elimination of Violence Against Women a hmanpuinaah he thu hi sawiin, President Erdogan chuan hmeichhiate chunga kutthlak chu mihringpuite phatsannaah a ngaih thu a sawi. Hetianga thila inhnamhnawihte chu na taka hrem zel an ni ang, a ti.

Erdogan chuan khawtlang nuna hmeichhiate pawimawhna te sawiin, hmeichhiate tello chuan society chuan awmzia a nei lo a ni, a ti.

Turkey Family and Social Policies Ministry chuan hmeichhiate laka hleilenna thubuai 20,000 a chhui mek tih a sawi bawk.

United Nations chuan khawvela hmeichhia hmun thuma ṭhena hmun khat chuan an damchhungin kutthlak emaw, mipat hmeichhiat lam hawia tihnawmnah emaw an tawk niin a tarlang. UN Secretary General Antonio Guterres chuan hmeichhiate zalen taka an awm a, an laka hleilenna leh tihhrehawmna thleng ṭhin laka an zalen theihna turin ṭanrual leh thawhho a ngai tih a sawi.