US-in Saeed man leh turin phut

Pakistan chuan hun eng emaw chen pawn chhuak thei loa house arrest-a a hren, firfiak pawl Lashkar-e-Taiba (LeT) hotu Hafiz Saeed chu a chhuah zalen a, mahse US chuan Saeed hi man leh turin Pakistan a hrilh.

Kum 2008 November 26-a Pakistan firfiakten Mumbai khawpui an beihnaa mawhphurtu bera puh, Hafiz Saeed hi kumin January thla aṭang khan house arrest-a hren a ni a, mahse sorkarin a lakah thubuai mumal taka thehluh a neih loh avangin kar kalta Ningani khan Lahore Court chuan a chhuah zalen a ni.

Saeed-a chhuah a nih chungchangah White House Press Secretary chuan thuchhuah siamin, Pakistan sorkar chu Saeed hi man leh a, a thil tihsualah thubuai siamsak turin a ti a, hei hi a ti lo a nih chuan Pakistan leh US inlaichinnaah nghawng a nei dawn niin a sawi.

US chuan Paksitan sorkarin Saeed-a laka thubuai a siamsak thei lo chu a dem thu sawiin, he thil hian firfiaka chetna do let tura Pakistan inpek dan a ti rinhlelhawm zo niin a sawi. US President chuan theihtawp chhuahin firfiakte do let turin a bei zel dawn a, hemi kawngah hian Pakistan pawhin tihtur pawimawh tak a nei ve a ni, a ti.

LeT hi US chuan Foreign Terrorist Organization-ah a puang tawh a, pawikhawihna thlena civil mi tam tak thihna thlentuah puhin, an pawikhawihnaah hian America mi pawh eng emaw zat an thi tawh niin a sawi.