Yemen chhawmdawlna tur thawn lut

Yemen ram mipui, ei tur tlachhama awm mekte tan chhawmdawlna tur wheat ton 25,000 thawn luh a ni. World Food Programme (WFP) thupuangtu, Abeer Etefa chuan Pathianni khan Yemen khawthlang lam, Saleef-a Red Sea port-ah chhawmdawlna phurtu lawng hi a thleng niin a sawi. He bial hi helpawl, Houthi ho thununna hnuaia awm mek a ni. Kar kalta Inrinni khan UN children's agency chuan Yemen-ah hian vaccine dose maktaduai 1.9 thawn luh a ni tawh bawk tih a sawi. Saudi Arabia-in Yemen kalpawhna hi hun eng emaw chen dan tawh vangin Yemen mipuite harsatna nasa tak an tawk mek a, an ram mipui tam tak chu chhawmdawl ngaiin an awm mek a ni. UN chuan Yemen mipui maktaduai 17-te chu ei leh in lamah chhawmdawl ngai an ni a, an zinga maktaduai sarih vel chu ṭam tuar mai thei dinhmunah an ding tih a sawi.